Yabur Dawuda - Sora 51:1-21
1 Dawuda xa bɛɛti bɛɛtibae xa mangɛ bɛ. 2 Annabi Natan wɔyɛnfe Dawuda bɛ a yunubi raba Batiseba ma tɛmui naxɛ.
3 Ala, hinnɛ n na alɔ i darixi a ra ki naxɛ.
Diɲɛ n ma fe ɲaaxi ma i xa bɔɲɛ fanyi saabui ra.
4 I xa n nasɛniyɛn n ma fe kobi birin ma.
I xa n ma yunubi xafari.
5 N bara n ma yunubi kolon.
N mu nɔma nɛɛmude na ma.
6 N na fe ɲaaxi rabaxi i keren nan na.
N naxan nabaxi a mu rafan i ma.
na n makiiti, nɔndi luma nɛ i bɛ.
7 N barixi yunubi fe nan kui,
kabi nga furi ba nɛɛnɛ ra.
8 Kɔnɔ nɔndi na lu mixi bɔɲɛ kui,
na nan nafan i ma.
Na lɔnni masen n bɛ.
9 N sɛniyɛn hisopi burɛxɛ ra,
alako n xa fiixɛ.
N sɛniyɛn,
alako n xa fiixɛ fɔɛn alɔ xiɲɛ.
10 Ɲɛlɛxinyi nun sɛɛwɛ fi n ma,
alako n bɔɲɛ xa sa.
11 I kobe ti n ma yunubi ra,
i xa n ma fe kobi birin ba n ma.
12 N Marigi Ala, n bɔɲɛ mafindi bɔɲɛ sɛniyɛnxi ra,
xaxili fanyi fi n ma.
13 I naxa n makuya i ya tode ra.
I naxa i Xaxili Sɛniyɛnxi ba n yi ra.
14 Kisi sɛɛwɛ nun limaniya fi n ma
naxan n malima.
15 N i xa kira masenma i matandie bɛ,
alako e man xa bira i fɔxɔ ra.
16 N nakisima Ala,
n bara mixi faxa.
Yandi, n xunsara,
alako n xa i xa fe fanyi masen.
17 N Marigi, na niya n bɛ,
n xa i tantu.
18 Sɛrɛxɛ mu rafan i ma,
xa na mu a ra n na bama nɛ i bɛ nu.
I mu wama sɛrɛxɛ gan daaxi xɔn.
19 Sɛrɛxɛ fanyi findixi yɛtɛ magoroe nan na.
Ala wama yi sɛrɛxɛ mɔɔli nan xɔn ma.
20 I xa hinnɛ Siyoni ra,
i xa Darisalam tɛtɛ rakeli.
21 Na tɛmui i ɲɛlɛxinma nɛ sɛrɛxɛ tinxinxi
nun sɛrɛxɛ gan daaxi ra.
Na tɛmui tuurae nan bama sɛrɛxɛ ra i xa sɛrɛxɛbade.
****
Maxɔrinyi: Ala wama won xa munse raba won ma yunubie xa fe ra? Xa i wama i gbe falafe muxu bɛ, i xa din labe ra a sɛbɛxi dɛnnaxɛ «Masenyi nun maxɔrinyi rasanba muxu ma.»
Ala xa baraka sa a xa wɔyɛnyi ma. Amina.
