Ala xa Taalie - Sora 10:1-32
1 Di lɔnnila a baba waxɔnyi rabama,
di lɔnnitare yigitɛgɛ wali nan nabama a nga ra.
2 harige sɔtɔ ki ɲaaxi mu sese gasama mixi ma,
harige sɔtɔ ki fanyi nan simaya fima mixi ma.
3 Alatala mu mixi tinxinxi luma kaamɛ ra,
kɔnɔ a tondima nɛ mixi ɲaaxi waxɔnyi sode a yi ra.
4 Bɛlɛxɛ walitare setareɲa nan bɛndunma mixi ma,
bɛlɛxɛ wakilixi bannaya nan fima mixi ma.
5 Di naxan wakilima xɛ xaba tɛmui lɔnnila nan a ra,
kɔnɔ di naxan xima xɛ xaba tɛmui baba rayaagi nan a ra.
6 Barakɛ na mixi tinxinxi fɔxɔ ra,
gere xaxili nan na mixi ɲaaxi tan yi ra.
7 Binyɛ birama tinxintɔɛ fɔxɔ ra,
kɔnɔ mixi ɲaaxi xili kanɛ nan sɔtɔma.
8 Lɔnnila tinma lude sɛriyɛ bun ma,
lɔnnitare tan a gima nɛ, a fa bɔnɔ.
9 Mixi naxan a ɲɛrɛma nɔndi ra,
a a ɲɛrɛma kantari nan kui,
mixi naxan mu a ɲɛrɛma nɔndi ra,
na tan fama rayarabide.
10 Mixi naxan nɔndi nɔxunma a booree ma,
a e tɔɔrɔfe nɛ,
naxan nɔndi falama a ki ma,
na tan e bɔɲɛ nan sama.
11 Tinxin mixi dɛ findixi simaya dulonyi nan na,
gere nan tun na mixi ɲaaxi tan dɛi.
12 Gbɛsɛnxɔnɛya gere xɔrɛ isɔxɔma,
kɔnɔ marafanyi diɲɛma fe kanaxi birin ma.
13 Lɔnni nan na xaxilima nɛnyi bun ma,
gbendegela nan birama lɔnnitare tan fɔxɔ ra.
14 Se kolonxi ragataxi lɔnnilae yi,
kɔnɔ lɔnnitare xa wɔyɛnyi fe nan tun kanama.
15 Banna harige maniyaxi taa sɛnbɛma nan na,
tɔɔrɔmixi xa kanɛ findixi e xa setareɲa nan na.
16 Tinxintɔɛ xa geeni findixi simaya nan na,
mixi ɲaaxi sare findixi ɲaxankatɛ nan na.
17 Mixi naxan xaranyi ragatama a tixi simaya kira nan xɔn,
kɔnɔ naxan mɛɛma marasi ra, a bɔnɔma nɛ.
18 Wule falɛ gbɛsɛnxɔnɛya ragatama.
Lɔnnitare wule raɲɛrɛma.
19 Wɔyɛnyi gbegbe nɔma mixi findide yunubitɔɛ ra.
Lɔnnila a dɛ suxuma.
20 Tinxintɔɛ xa wɔyɛnyi tide gbo gbeti bɛ,
kɔnɔ mixi ɲaaxi bɔɲɛ tide xurun.
21 Tinxintɔɛ xa marasi mixi raɲɛrɛma,
kɔnɔ xaxilitare faxama lɔnnitareɲa nan kui.
22 Alatala xa barakɛ nan mixi bannama,
mixi sɛnbɛ mu sese sama na fari.
23 Fe ɲaaxi rafan mixi kobi ma,
kɔnɔ lɔnni rafan xaxilima ma.
24 Mixi ɲaaxi hɛnmɛma fe naxan na,
na nan a lima.
Mixi tinxinxi waxɔnfe,
Ala nan na nabama a bɛ.
25 Fe xɔrɔxɔɛ na fa, mixi ɲaaxi yo mu luma,
kɔnɔ sese mu mixi tinxinxi tan toma.
26 Muluxunyi fe naxan niyɛma ɲinyi ra,
tuuri fe naxan niyɛma ya ra,
tunnaxɔnɔɛ fan na nan niyɛma a xɛɛma ra.
27 Alatala xa yaragaaxui simaya nan fima mixi ma,
kɔnɔ mixi ɲaaxie xa simaya xɔn mu kuya.
28 Mixi tinxinxie xa tina findima e bɛ sɛɛwɛ nan na,
kɔnɔ mixi ɲaaxie xa tina findima e bɛ tɔɔrɔɛ nan na.
29 Alatala xa kira findixi kantari nan na mixi tinxinxie bɛ,
kɔnɔ a findixi halaki nan na tinxintaree bɛ.
30 Tinxintɔɛ mu birama fefe ma,
kɔnɔ mixi ɲaaxi mu luma bɔxi ma.
31 Mixi tinxinxi dɛ lɔnni nan masen ma,
kɔnɔ wule falɛ nɛnyi bolonma nɛ.
32 Tinxintɔɛ dɛ fe fanyi nan falama,
kɔnɔ mixi ɲaaxi fe ɲaaxi nan falama.
****
Maxɔrinyi: I munse toma Ala xa lɔnni nun Adama xa lɔnni tagi? Xa i wama i gbe falafe muxu bɛ, i xa din labe ra a sɛbɛxi dɛnnaxɛ «Masenyi nun maxɔrinyi rasanba muxu ma.»
Ala xa baraka sa a xa wɔyɛnyi ma. Amina.
