Fe fɔlɔ fɔlɛ - Sora 16:1-16
1 Sarayi mu nu di yo bari a xa mɔri Iburama bɛ. Konyi ginɛ Misiraka nu na Sarayi yi ra, naxan xili Hagara. 2 Sarayi naxa a fala Iburama bɛ, «I bara a to, Alatala mu di bari fe ragirixi n tan ma. Kɔnɔ tɛmunde n nɔma di sɔtɔde n ma konyi ginɛ saabui ra i bɛ. Wo xa lu yire keren to kɔɛ ra.» Iburama naxa tin Sarayi xa wɔyɛnyi ra. 3 Sarayi naxa a xa konyi ginɛ Hagara Misiraka tongo, a naxa a so a xa mɔri Iburama yi ra, a xa findi a xa ginɛ ra. Iburama nu bara ɲɛ fu raba Kanaan bɔxi ma.
4 Iburama nun Hagara naxa xi yire keren, na nan findi Hagara bɛ tɛɛgɛ ra. Hagara to bara a kolon a a bara tɛɛgɛ, a naxa yo a kanyi ma, a naxa a mato mato ki kobi ra. 5 Sarayi naxa a fala Iburama bɛ, «I tan nan a niyaxi yi bɔtɛ raba xa ilan n na! N tan nan findixi saabui ra, n ma konyi ginɛ fife ra i ma a xa findi i xa ginɛ ra. Kabi a naxa a kolon a furuxi, a fa fe kobi nan tun ilanma n na. Alatala xa won tan firinyi makiiti.» 6 Iburama naxa a xa ginɛ yaabi, «I xa konyi ginɛ na a ra. I wama fe naxan birin xɔn ma, a birin dɔxɔ a ma.» Sarayi to a waxɔnfe kobi birin dɔxɔ Hagara ma, Hagara naxa a gi.
7 Alatala xa malekɛ naxa naralan Hagara ra ye dula fɛ ma Suru kira xɔn ma gbengberen yire. 8 Malekɛ naxa Hagara maxɔrin, «Sarayi xa konyi ginɛ Hagara, i kelixi minden? I sigafe minden?» Hagara naxa malekɛ yaabi, «N nan n gixi n kanyi nan ma.» 9 Alatala xa malekɛ naxa a masen Hagara bɛ, «I man xa gbilen i kelide, i sa i magoro i kanyi bɛ.» 10 Alatala xa malekɛ naxa a fala a bɛ, «N fama bɔnsɔɛ wuyaxi fide i ma, i mu nɔma naxan kɔnti kolonde.» 11 Alatala xa malekɛ man naxa a fala a bɛ,
«I tɛɛgɛxi nɛ yi ki. I fama di sɔtɔde.
I na di xili sama nɛ Sumayila,
barima Alatala bara i xui mɛ i xa marayaagi kui.
12 I xa di findima geresoe ra
alɔ wulai soe a rabama ki naxɛ.
A mixi birin gerema nɛ,
birin a tan fan gerema nɛ.
A xunyae fan a gerema nɛ.»
13 Hagara naxa xili sa Alatala xun, naxan wɔyɛn a bɛ, «Alatala naxan n toxi.» A naxa a fala, «N bara n toma to.» 14 Na nan a toxi e na kɔlɔnyi xili falama, «Ala ɲiɲɛ naxan n toxi.» Na kɔlɔnyi na Kadesi nun Bereda nan tagi. 15 Hagara naxa di sɔtɔ Iburama bɛ. Iburama naxa a xili sa Sumayila. 16 Iburama nu bara ɲɛ tongo solomasaxan nun senni sɔtɔ simaya ra, Hagara fa na di sɔtɔ a bɛ.
****
Maxɔrinyi: Annabi Sumayila xa bari munse masenxi a nga Hagara bɛ Ala xa fe ra? Xa i wama i gbe falafe muxu bɛ, i xa din. Labe ra a sɛbɛxi dɛnnaxɛ «Masenyi nun maxɔrinyi rasanba muxu ma.»
Ala xa baraka sa a xa wɔyɛnyi ma. Amina.
